Thoresen i retten: Meiner han tok fallet for andre sine feil

– Eg oppfatta dette som ein klar trussel. Særdeles ubehageleg.

Slik skildrar den omplasserte leiaren i Forsvarsbygg, Thorbjørn Thoresen, augeblikket han blei tilboden permisjon frå rolla si i fjor.

2025 var eit tungt år av mange grunnar, fortel han. I løpet av våren var det fire dødsfall i familien, og etter eit sjukehusopphald i «kritisk og alvorleg tilstand», blei han sjølv sjukemeld i august.

Dagen etter at han fekk kome heim frå sjukehuset kom det ei møteinnkalling på e-post frå departementsråd Frede Hermansen i Forsvarsdepartementet.

Møtet gjeld ei varslingssak mot deg, heiter det i e-posten.

– Eg fekk ikkje vite kva varselet handla om, men eg fekk eit ganske klart ultimatum. Skulle eg bli presentert for varselet av varslingseininga, så måtte eg først signere ein avtale om frivillig permisjon, seier han.

Han hevdar at avgjerda viste seg å ikkje handle om undersøkingane, men var Hermansen sitt val å gjennomføre.

Tysdag vitnar departementsråd Frede Hermansen i retten.

Permisjonen, som Thoresen i dag kallar «ein ulovleg suspensjon», skulle vare til seinast 28. februar i år, ifølge avtaledokumentet.

Undervegs blei det klart at han ikkje fekk jobben tilbake.

– Utestengd og isolert

Måndag starta den sivile rettssaka mellom Thoresen og Forsvarsdepartementet (FD).

20. februar i år blei Thoresen fjerna med tvang frå sjefsrolla i Forsvarsbygg. Han meiner dette var ulovleg, og krev jobben tilbake i tillegg til erstatning.

– Eg sat igjen etterpå med ei heilt klar kjensle om at det var nokon her som ønska å legge det heile og fulle ansvaret på meg for det som hadde skjedd, seier Thoresen.

Departementet står ved at det hadde rett til å omplassere etatsleiaren sin når det ikkje lenger hadde tillit. 

– Eg hadde heile vegen vore totalt utestengd og isolert. Dei hadde gjort det heilt umogleg for meg å få innsyn i eiga sak, og å kunne bygge kontradiksjon. Det har vore ein lang periode med trakassering for å tvinge meg ut.

No sit Thoresen på eit loft i fjerde etasje, og jobbar med «utvikling av politikkområde som Forsvarsdepartementet har behov for å få utvikla».

Denne skildringa kjem frå ein e-post frå Forsvarsdepartementet til Thoresen 28. juni i år, som blei vist fram i retten. Thoresen meiner at oppgåvene ikkje er relevante for hans stilling.

Departementet seier det har bede Thoresen om innspel til kva oppgåver han skal gjennomføre i den rolla han har. FD meiner at rammeavtalane blei brotne med overlegg frå Thoresen si side, og at dette skjedde i skjul frå dei.

Hevdar at han ikkje visste

Varslingssaka som gjorde at Thoresen blei beden om å ta permisjon, blei lukka i januar i år.

Like etterpå blei Stortingets kontrollkomité varsla om noko heilt anna – ulovlege brot på fire rammeavtalar i Forsvarsbygg si portefølje.

To av desse hadde å gjere med storsatsingar frå Forsvaret si side: nye radaranlegg, og bygg og anlegg til nye ubåtar på Haakonsvern.

Sjølv meiner Thoresen at han fekk vite om brota dagen etter at Stortinget blei informert.

– Første gongen eg idet heile blei merksam på desse overskridingane, på desse fire kontraktane som det har vore snakk om no, det var ein e-post eg fekk frå Frede Hermansen 6. januar i år, seier Thoresen.

Sjølv om det var ei varslingssak som gjorde at Thoresen gjekk ut i permisjon, har ikkje denne noko med omplasseringa å gjere.

Det sa advokat Ingrid Skog Hauge i Regjeringsadvokaten.

– Det er rammeavtalesaka. Men varslingssaka har hatt betydning for tidspunktet for iverksetjinga av omplasseringa, seier ho.

– Det er heilt på det reine at prosessen har teke tid, men staten er ikkje einig i at det utelukka er grunna forhold på staten si side. Det er grunna forhold på begge partar si side.

Hauge sa også at det var viktig for avgjerda at det ikkje var kva som helst prosjekt som er involverte i rammeavtalebrota, men dei viktige satsingane på ubåtar og radaranlegg.

– Det har vore overskridingar i heile forsvarssektoren. Hovudpoenget er at både Forsvaret og Forsvarsmateriell løpande har varsla om denne risikoen. Forsvarsbygg har ikkje flagga det som ein risiko.

– Medvite val

Thoresen er likevel tydeleg om at sjølv om han ikkje medvite har brote lova, er det andre som har teke det valet.

– Det er ikkje nokon tvil om at nokon bevisst har gjort nokon val i strukturen som har medført at ein har gjennomført desse avropa, og at ein har gått over dei rammene som avtalen har sett, seier Thoresen.

– Det naturlege for meg ville vore at eg sjølvsagt måtte stå i dette inntil eventuelle eksterne undersøkingar var ferdige, og då måtte ta konsekvensane av det.

Då Thoresen var sjukemeld i 2025 var det Camilla Mathisen som var fungerande direktør i Forsvarsbygg. Det er også ho som leier etaten i dag.

Rettssaka held fram i Oslo tingrett tysdag. Då skal forsvarsminister Tore O. Sandvik innta vitneboksen.

Les også

Forsvaret

Brukt fem år på plassering av garasje

Søksmål

Ble ikke enige – vil tilbake i sjefsjobben

forsvarsbygg

Har avdekket svakheter hos Forsvarsbygg