Debatt
Nytt om navn
Nyheter
Meir av inntekta frå Forsvaret skal gå til pensjon
Nesten eit år etter dommen i Høgsterett, har regjeringa bestemt at Forsvaret skal betale pensjon for dei fleste lønstillegga i Arbeidstidsavtalen.
Dei fleste tillegg som forsvarstilsette får når dei er på vakt, øving og seglas, skal gå til pensjonsopptening.
Det har regjeringa bestemt måndag, som svar på ein dom frå Høgsterett i fjor.
Dermed er dei fleste av tillegga i Arbeidstidsavtalen i Forsvaret pensjonsgivande.
– Forsvarets tilsette utfører krevjande oppgåver på vegner av Noreg og fellesskapet, og arbeidet medfører store unntak frå arbeidsmiljølova sine krav om arbeidstid, seier arbeids- og inkluderingsminister Kjersti Stenseng.
– Denne avklaringa gir eit nødvendig grunnlag for den vidare oppfølginga av saka, slik at dei tilsette får den pensjonen dei skal ha.
Endringa gjeld tillegg som er frå:
vaktteneste
fartøyteneste
øving
adjutantteneste
flyoperativ verksemd
Den gjeld alle tillegg som er godkjende sidan den gjeldande hovudtariffavtalen i staten tredde i kraft, altså 1. januar 2020.
Ein treng ikkje å gjere noko for å få etterbetalt det ein skal ha i pensjon, ifølge Forsvaret.
Har teke eit år
Det var våren 2025 Høgsterett bestemte at tillegga ein får når ein er på vakt på land og til sjøs, skulle reknast som pensjonsgivande.
Nesten eitt år seinare utvidar regjeringa dette til å gjelde fleire typar tillegg.
Grunnen til forseinkinga er eit omfattande arbeid med å greie ut kva Høgsterett-avgjerda betyr juridisk, administrativt og økonomisk, skriv regjeringa i pressemeldinga.
No byrjar arbeidet med å få utbetalt rett pensjon til dei det gjeld.
– Vi veit at mange har venta på avklaringa som no har kome. Målet er at alle skal få rett pensjon og korrekt innrapportering så raskt som mogleg, men det vil ta tid, seier HR-direktør i Forsvaret Cecilie Heuch.
– Vi kjem tilbake med meir informasjon så snart vi kan.
BFO: – Ein sigersdag
Den nye leiaren i Befalets fellesorganisasjon (BFO), Lars Ullensvang, er opprømt.
– I dag er ein sigersdag for tilsette som øver, signar og går vakt. Etter fleire år med kamp er vi i mål, seier han i ei pressemelding.
No får forsvarstilsette ein pensjon som i mykje større grad speglar jobben dei faktisk gjer, fortset Ullensvang.
– Denne avklaringa bidreg til føreseielegheit for dei tilsette som skal gjennomføre Forsvarsløftet, seier han.
– Forhåpentlegvis vil Forsvaret med dette behalde verdifulle tilsette og viktig kompetanse.
