Vil lære Russland ei historisk lekse

ARENDAL (Forsvarets forum): Eit seinsommarteikn: store delar av norsk offentlegheit er i Arendal for å debattere det som opptek dei mest.

Også politikarane, som måndag samla seg på hovudscena i sentrum for å snakke om norsk utanrikspolitikk. Særleg i møte med Russland.

Leiar av utanriks- og forsvarskomiteen på Stortinget, Peter Frølich (H), meiner at eit sterkare norsk militære vil bety mindre pengar på velferd.

– Vi er nøydde til å ta ein kostnad som generasjonar før oss også til tider har måtta ta, når ein blir utfordra frå dei mørkaste kreftene på jordkloden, sa han.

– Kostnaden langt der framme av å bli dikterte av autoritære krefter, og miste delar av fridommen vår, er mykje større enn den midlertidige auken i forsvarsbudsjettet.

Utanriksminister Espen Barth Eide (Ap) sa også at pengane må kome frå andre sektorar, men ville ikkje peike på ei konkret kjelde.

– For å vere heilt ærleg, når vi brukar mykje meir på forsvar, blir det ikkje mykje pengar igjen til andre ting, sa han.

– Men no er akkurat Noreg såpass godt stilt med økonomisk vekst, at det først og fremst betyr mindre meir på andre område.

Ei normalisering

Utanriksministeren kalla dessutan auken i forsvarsutgifter, som ein blant anna ser i den reviderte langtidsplanen, for ei normalisering.

– Det vi eigentleg gjer er å gå tilbake til det nivået på forsvar som del av BNP som vi hadde under den kalde krigen, sa han.

– Kvifor? Jo, fordi verda er mykje farlegare. Ein del av svaret, men ikkje heile svaret, er eit godt forsvar i Noreg, godt forankra i Norden, Nord-Europa, Europa og Nato.

Frølich nytta moglegheita til å ta opp att eit norsk EU-medlemskap.

– I ei verd som no blir farlegare og farlegare, er det heilt avgjerande at vi har eit realistisk forhold til verda rundt oss, og at vi søker så tette samarbeid som mogleg, sa han.

– Eg ser litt på utanriksministeren i håp om at ein snart kan heve dette «ikkje snakk om EU», og at vi har ein realistisk debatt om moglegheitene.

Ein slik diskusjon er regjeringa med på å ha, utan at det nødvendigvis betyr å søke medlemskap, svarte Barth Eide.

Definisjonen av siger

Debattantane blei også utfordra til å skildre kva dei ville kalle ein siger for Ukraina.

– Rettvis og stabil er det aller viktigaste, sa Barth Eide. 

Dei krava som han meiner Ukraina må kunne setje, er at krigen tek varig slutt, og at landet framleis er sjølvstyrt, både i dag og i framtida.

Frølich sa seg einig, men la til kravet om at Ukraina må få tilbake områda som Russland har annektert.

– Vi må avslutte denne krigen på ein måte som lærer Russland ei historisk lekse, sa han.

– Det å angripe nabolandet på den måten dei har gjort aldri kan gjenta seg, at det aldri kan kome til å lønne seg, og at dei aldri på sikt kan rekne med å behalde desse territoria heller.

Les også

Russisk nyhetsbyrå

Fleire drepne av dronar djupt inne i Russland

Våpenproduksjon

Pentagon presser forsvarsindustrien

Tyskland

– Hybridkrig er blitt dagligdags