Forsvaret utvidar tilbodet til familiar i nord

– Ei avgjerd om å flytte handlar om langt meir enn arbeidsplassen til den forsvarstilsette. Skal vi lukkast med å få fleire til å etablere seg der dei tenestegjer, må vi sjå behova til heile familien og involvere medflyttarane langt betre enn i dag, seier sjefen for Trenregimentet, oberst Michael Spanne Rozmara i ei pressemelding.

Trenregimentet er ei logistikk og støtteavdeling i Hæren.

Forsvaret skriv vidare i pressemeldinga at dei søker etter tre busetjingskoordinatorar, to til Bardufoss og ein til Porsangmoen. 

Forsvaret utvidar Brigade Nord i Troms med blant anna ein ny mekanisert bataljon. I tillegg bygger Forsvaret opp den heilt nye Finnmarksbrigaden som skal vere fullt bemanna i 2033. 

Busetjingskoordinatorane skal vere bindeledd mellom kommunane, Forsvaret, familiane og lokalsamfunnet. Dei skal hjelpe tilsette og familiar med informasjon, praktisk støtte når det kjem til bustad, skule, barnehage og jobbar til medflyttarane, skriv Forsvaret vidare i pressemeldinga.