Ekssjef i Forsvarsbygg får ikkje jobben tilbake

Forsvarsdepartementet si avgjerd om å omplassere Thorbjørn Thoresen frå sjefsjobben i Forsvarsbygg er gyldig.

Slik lyd dommen frå Oslo tingrett fredag.

Departementet blir dermed frifunne i saka, og Thoresen må betale 306.150 kroner i sakskostnader til staten.

Gjennom fire dagar i retten fekk både den tidlegare Forsvarsbygg-sjefen og leiaren hans, departementsråd Frede Hermansen, forklare seg i to omgangar.

Thoresen meinte at omplasseringa var ulovleg, og kravde både erstatning og jobben tilbake.

Forsvarsdepartementet (FD) meinte det hadde rett til å omplassere Thoresen når det ikkje var tillit til han som direktør.

Både Forsvarsministeren og Forsvarssjefen var vitne i saka, i tillegg til fungerande direktør i Forsvarsbygg Camilla Mathisen.

Får ansvar for overskridingar

Den 17. februar i år avdekka ein intern gjennomgang at det var gjort ulovlege innkjøp over forbruksgrensa til fire av Forsvarsbygg sine rammeavtalar.

Thoresen seier han ikkje visste om desse før FD opplyste han om dei.

Retten kom likevel fram til at overskridingane var hans ansvar, uansett om han visste om dei eller ikkje.

– Etter hovudforhandlinga finn tingretten klar sannsynsovervekt for at Thoresen deltok personleg i avgjerda om overskriding, heiter det i dommen.

– Sjølv utan personleg skyld, vil ein toppleiar oftast ha både det operasjonelle, juridiske og moralske endelege ansvar for den verksemda hen leiar - slik ein toppidrettsutøvar har ansvaret for innhaldet i eigne dopingprøvar.

Den omtalar særskilt to rammeavtalar mellom Forsvarsbygg og høvesvis Sweco og Multiconsult.

Thoresens advokat, Marianne Klausen, skriver i en e-post til Forsvarets forum at Thoresen er skuffet over dommen. 

– Fleire av vurderingane til tingretten er ikkje underbygde med bevis, og andre er ikkje vegne opp mot forklaringar og dokument som vart lagde fram under hovudforhandlinga. Konsekvensen av avgjerda er at ein etatsleiar i staten ikkje har stillingsvern, og at dei står objektivt ansvarlege for alt som skjer i verksemda.

– Dessutan er avgjerda ikkje i tråd med det arbeidstakarvernet som følgjer av lovgivinga elles, og som er gjenteke i mange avgjerder frå Høgsterett, seinast i oktober i år.

Avgjerda frå dommarane er einstemmig. Dommen kan framleis bli anka, og er difor ikkje enno rettskraftig. No vil Klausen og Thoresen gå gjennom dommen saman, før han tek stilling til spørsmålet om anke.

Les også

Forsvarsbygg

Thoresen i retten: Meiner han tok fallet for andre sine feil

Forsvarsdepartementet

FD i retten: – Ein etatsleiar må haldast ansvarleg

Forsvarsbygg

Ble ikke enige – nå vil den avsatte sjefen ha jobben tilbake